|
पाेखरा, २० माघ । घरपरिवार र आफन्तविहीन भई कष्टप्रद सडकजीवन विताउँदै आइरहेका सहयोगापेक्षी सडकआश्रितहरुको सेवामा समर्पित मानवसेवा आश्रमको भवननिर्माणको लागि आजबाट पोखरामा महायज्ञ आयोजना हुँदैछ ।
आज दिनको ११ बजे विष्णु पादुका माई स्थानबाट कलश यात्रा सुरु भई प्रगति चोक, मिलन चोक, सापकोटा चोक हुँदै बावियतरामा पुगी औपचारीक रुपमा महायज्ञ समुद्घाटन हुने कार्यक्रम रहेको छ । मानवसेवा आश्रमको निर्माणाधिन भवन प्राङ्गणमै महायज्ञ हुनेछ ।
गण्डकी प्रदेश सरकारका सामाजिक विकास तथा स्वास्थ मन्त्री पञ्चराम गुरूङले आज महायज्ञको समुद्घाटन गर्ने मानवसेवा आरुश्रमका प्रमुख संस्थापक एवं केन्द्रीय अध्यक्ष रामजी अधिकारीले बताए। यज्ञको प्रमुख वाचकको भूमिकामा मानवसेवा आश्रमका अभिभावक एवं भागवत भाष्कर कमल नयन गौतम रहेका छन्।
मकवानपुर हेटौंडामा २०६९ सालमा स्थापना भएको मानवसेवा आश्रमले २०७४ साल चैत्र १७ पोखरामा आफ्नो ९ औ शाखाको रुपमा सेवा विस्तार गरेको थियो । नेपाल सरकारका तत्कालिन संस्कृति पर्यटन तथा नागरिक उड्ययन मन्त्री स्व. रविन्द्र अधिकारीले समुद्घाटन समारोहको प्रमुख अतिथिका रुपमा मानवसेवा आश्रम पोखरा शाखाको समुद्घाटन गरेका थिए।
छोरेपाटन स्थित भाडाको घरबाट सेवा सुभारम्भ गरेको मानवसेवा आश्रलाई पोखरा २५ बाबियातारा हेम्जामा ६३ रोपनी जग्गाश्री लक्ष्मीनारायण सनातन संस्कार प्रतिष्ठानले उपलब्ध गराएपछि मानवता, परोपकार र सामाजिकसेवा अध्ययनको गन्तव्य कै रुपमा विकास गर्नेगरी मानवसेवा आश्रमले निर्माण कार्य अघि बढाएको थियो ।
दश करोड पचहत्तर लाख अनुमानित लागत रहेको मानवसेवा आश्रम पोखरा शाखाको पचास प्रतिशत निर्माण कार्य सम्पन्न भइसकेको छ भने अव भवन निर्माण सम्पन्न गर्न ४ करोड रुपैया आवश्यक रहेको मानवसेवा आश्रमका कोषाध्यक्ष एवं गण्डकी प्रदेश प्रमुख होमनाथ तिमल्सिनाले बताए।
महायज्ञलाई सम्पन्न गर्न आश्रमका अभिभावक तथा जग्गादाता परिवार सदस्य मोति बहादुर थापाको संयोजकत्वमा १००८ सदसीय मूल आयोजक समिति र ३३ विषयगत समितिहरु गठन भएको छ । महायज्ञलाई सफल बनाउन सातै प्रदेशमा रहेका मानवसेवा आश्रमका अभियान्ताहरु पोखरा केन्द्रीत भइरहेका छन् ।
२७ गतेसम्म हरेकदिन विहान ११ बजेदेखी ४ बजेसम्म कथा प्रवचन र झाँकी प्रर्दशन हुनेछ भने हरेक दिन साँझ ७ बजेदेखी ९ बजेसम्म सन्ध्याकालिन भजन आयोजना हुनेछ । सफल आवाज
