|
दुई वर्षअघि लोकगायक पशुपति शर्माले ‘लुट्न सके लूट कान्छा लुट्न सके लूट, अन्त कतै पाइँदैन नेपालमै छ छुट’ बोलको गीतले तत्कालीन दुई तिहाइ सरकारलाई हल्लाएको थियो ।प्रधानमन्त्री एवं एमाले अध्यक्ष केपी ओलीको सरकारको बचाउमा उनका समर्थक र कार्यकर्ताले गायक शर्मालाई ज्यान धम्कीसमेत दिएका थिए ।
राष्ट्रपति विद्यादेवी भण्डारीको अपमान गरेको भन्दै एमाले नेता कार्यकर्ता बुरुक बुरुक उफ्रेका थिए । सो गीत युट्युबबाट हटाउन धम्की दिएपछि शर्मा बाध्य भएर हटाए ।
पछि संशोधन गरेर राख्न त राखे तर पहिलेको जस्तो चार्म गीतमा देखिएन । सो गीत आएको केही समयपछि प्रधानमन्त्री ओलीले सार्वजनिक रूपमै गीतको आलोचना गर्दै आफ्नो सरकारको पालामा भ्रष्टाचार नभएको, राज्यको ढुकुटी नलुटेको प्रस्टीकरण दिएका थिए ।
अहिले गायक प्रकाश सपूतको गीतले माओवादी केन्द्रमा भुइँचालो नै ल्याएको छ । सो पार्टीका नेता कार्यकर्ता तथा भ्रातृसंगठनले गायक सपुतलाई गीत युट्युबबाट हटाउन र माफी माग्न चेतावनी मात्र दिएका छैनन्, ज्यान धम्कीसमेत दिएका छन् ।
चाहे हिजो पञ्चायत होस् या अहिले गणतन्त्र नै होस्, शासकहरुले आफ्नो आलोचना नरुचाएको प्रस्ट देखियो । माओवादी केन्द्रका नेता कार्यकर्ता र विभिन्न संगठनहरुले प्रकाश सपूतको ‘पिर’ प्रति आक्रोश व्यक्त गरिरहेका बेला अध्यक्ष प्रचण्डले उत्तेजित कोही हुनु आवश्यक नभएको बताएका छन् ।
सोमबार बिहान धनगढी पुगेका उनले पूर्वलडाकुहरू देशको निम्ति शान्तिमा आइयो भनेर गर्व गर्ने र कत्रो सपना देखेको थिएँ माओवादीले शान्तिमा ल्याएर बर्बाद पारे भन्ने पनि रहेको बताए ।
‘महिलाका हिजो जनयुद्धको बेला वीरता र कीर्तिमान कायम गरेका कुरा पनि छन् । त्यतिबेला राज्यका पक्षबाट भएका दमन र अत्याचार पनि छन् । यो विषयमा उत्तेजित कोही हुनुपर्ने छैन । तर्क बितर्क हुन्छन् त्यसलाई सहज स्वाभाविक रूपमा लिनुपर्छ । अहिले मात्र होइन सयौं वर्ष हामी गइसकेपछि पनि हुनेवाला छ,’ उनले भने । एउटा गीतले ल्याएको तरंगबारे प्रचण्डले मुख खोल्नु सानो कुरा होइन ।
