|
पाकिस्तानको पञ्जाब प्रान्तमा १४ वर्षीय बालकले आमा, एक दाजु र दुई दिदीको हत्या गरेका छन् । उनले पब्जी खेलको प्रभावमा परिवारका सदस्यको हत्या गरेको प्रहरीले जनाएको छ । राजधानी लाहौरका प्रहरीले शुक्रबार एक परिवारका सदस्यको शव फेला परेको जानकारी दिएका हुन् । प्रहरीका अनुसार अघिल्लो हप्ता काहना इलाकामा स्वास्थ्यकर्मी ४५ वर्षीया नाहिद मुबारक, उनका २२ वर्षीय छोरा तैमुर, १७ र ११ वर्षीया छोरीको शव भेटिएको हो । प्रहरीका अनुसार नाहिदका १४ वर्षीय छोरा भने सुरक्षित थिए । तर, उनी नै हत्यारा निस्किए ।
प्रहरीका अनुसार उक्त १४ वर्षीय बालक पब्जी खेलको लत लागेको थियो । उनले खेलकै प्रभावमा आमा र परिवारका अन्य सदस्यको हत्या गरेको स्वीकार गरेका छन् । लामो समयसम्म लगातार अनलाइन खेलले उनमा मनोवैज्ञानिक समस्या उत्पन्न भएको प्रहरी अनुसन्धानमा खुलेको छ ।
२०७८ माघ १५, शनिबार प्रकाशित
